ABŞ-ın yeni seçilmiş prezidenti Donald Tramp Ukraynaya ərazilərini qaytarmadan Rusiya ilə hərbi münaqişəni dondurmağı və ən azı 20 il NATO-ya üzv olmaqdan imtina etməyi təklif edə bilər.

Qaynarinfo xəbər verir ki, bu barədə məlumatlı mənbələr "The Wall Street Journal”a (WSJ) bildiriblər.

Onların sözlərinə görə, Trampın müşavirləri hazırda müharibəni bitirmək üçün belə bir ssenarini müzakirə edirlər. Ehtimal olunur ki, hərbi əməliyyatların dondurulmasından sonra bütün cəbhə xətti boyunca hərbsizləşdirilmiş zona elan olunacaq. Lakin onun təhlükəsizliyini kimin təmin edəcəyi hələlik məlum deyil. Eyni zamanda, WSJ-nin həmsöhbətlərindən biri Amerika qoşunlarının və ya BMT kontingentinin bu işə qarışacağını istisna edir.

Öz növbəsində, yaxın 20 ildə NATO-ya üzv olmaqdan imtina etdiyinə görə Tramp Ukraynanı silahla təmin etməyə davam edəcəyinə söz verəcək. "Biz hərbçilərə təlim keçə və başqa dəstək verə bilərik, lakin bunu ilk növbədə Avropa ölkələri edəcək. Biz amerikalı kişi və qadınları Ukraynada sülhü qorumaq üçün göndərmirik. Və biz bunun üçün pul ödəmirik. Polyaklardan, almanlardan, ingilislərdən və fransızlardan bunu etmələrini xahiş edin", deyə Trampın komandasının üzvlərindən biri bildirib.

Eyni zamanda, WSJ-nin həmsöhbətləri Trampın Ukraynadakı hərbi münaqişəyə son qoymaq üçün konkret planı hələlik təsdiqləmədiyini vurğulayıblar. Respublikaçıların keçmiş milli təhlükəsizlik üzrə köməkçisi qeyd edib ki, Tramp şəxsən və ən son anda qərar verəcək, ona görə də heç kim prezidentin nə qərar verəcəyini əvvəlcədən deyə bilməz.

Bununla belə, WSJ qeyd edir ki, mənbələrin müharibəni bitirmək üçün təsvir etdiyi plan, vitse-prezident seçilən Ceyms Di Vensin sentyabrda münaqişənin həllini necə təqdim etdiyinə bənzəyir. Onun sözlərinə görə, Tramp Rusiyanın Ukrayna ərazilərini saxlaması, hazırkı cəbhə xətti boyunca hərbsizləşdirilmiş zonanın yaradılması, Rusiya ilə təkrar münaqişə vəziyyətində Ukrayna qoşunlarının gücləndirilməsi ilə bağlı saziş təklif edəcək. Moskva da öz növbəsində Ukraynanın NATO da daxil olmaqla hərbi ittifaqlara qoşulmayacağına dair təminat alacaq.

WSJ gözləyir ki, fərqli baxışlara malik olan müxtəlif fraksiyalar Trampın ikinci dövründə onun xarici siyasətinə təsir göstərmək üçün mübarizə aparacaq. Belə ki, müdafiə naziri postuna namizədliyini irəli sürən keçmiş dövlət katibi Mayk Pompeo Rusiya üçün qələbə kimi görünməyəcək nizamlanmada israr edə bilər. Amma dövlət katibi və ya milli təhlükəsizlik üzrə müşaviri postuna əsas namizəd hesab edilən Riçard Qrenell müharibəni tez bir zamanda bitirmək üçün Ukraynanın əhəmiyyətli ərazi güzəştlərinə razı ola bilər.

Nizami Bağırov