Kolumbiyalı müğənni Şakira ispaniyalı futbolçu Cerard Pikenin futbol oynaması üçün karyerasını qurban verdiyini deyib və onun xəyanətindən necə xilas olduğunu açıq şəkildə danışıb.

Qaynarinfo xəbər verir ki, 47 yaşlı sənətçi yeddi ildən sonra ilk yeni albomunun işıq üzü görməsi ərəfəsində müsahibə verib.

Şakira onu və iki uşağını 25 yaşlı Klara Çiaya dəyişən futbolçunun xəyanətindən necə qurtulması haqda bunları deyib:

"Bu, ilkin planlarıma daxil olmasa da, konseptual albomdur. Ailənin dağılması isə yəqin ki, insanın yaşaya biləcəyi ən ağrılı hadisələrdən biridir. Amma oldu. Əgər həyat sənə limon verirsə, sən limonad hazırlayarsan. Bu albomla belə etdim - məyusluğum, qəzəbim və kədərimlə mübarizə aparmaq üçün yaradıcılığımdan istifadə etdim. Ağrıları məhsuldarlığa çevirdim. "Monotonía" mahnısının videosunda mən sinəmdə dəliklə görünürəm, çünki itki ilə üzləşdiyim zaman hiss etdiyim fiziki hiss məhz bu idi. Hiss edirdim ki, insanlar mənim sinəmin içindən görə bilirlər, arxasında nə olduğunu görürlər. Amma yazdığım hər mahnı ilə özümü bərpa etdim", deyə müğənni etiraf edib.

Şakira Pike ilə ayrıldığı müddətdə təkcə onun xəyanətindən narahat olmadığından danışıb:

"Məndən də üz döndərən insanlar oldu - mənə işləyən və mənə xəyanət edən insanlar. Və hər şeylə eyni anda qarşılaşmalı oldum. Sonra atam dəhşətli bir qəza keçirdi və onun nevroloji problemləri ilə nəticələndi. Atam həmişə mənim ən yaxşı dostum olub, ona görə də ən çox ehtiyacım olanda mənə ən yaxşı məsləhəti vermək üçün yanımda olmayıb. Ona görə də böyük ağrılar dövrü idi".

Yeni albomu haqqında danışan müğənni Pikeni Harri Potter əsərinin əsas mənfi obrazı Voldemortla da müqayisə edib.

"Bu, albomun sonuncu mahnısı idi, ona görə də onu "The Last One” ("Sonuncu”) adlandırdım. Bütün treklərimiz hazır idi, amma mən düşündüm: "Yox, yox, mən bu albomu belə bitirə bilmərəm”. Hələ içimdə nəsə ilişib qalmışdı və onu çıxartmalı idim. Bu mahnını "Sony"nin marketinq departamentinin rəhbərinə səsləndirdim və o, ağlamağa başladı. Həyatımda indiyə qədər ağlayan kişi görməmişdim... Və bu, tanıdığınız və adının çəkilməsi mümkün olmayan Voldemort haqqında yazmağı planlaşdırdığım son mahnıdır", deyə o, sözlərini tamamlayıb.

Nizami Bağırov