Polşada əvvəlki hakim Hüquq və Ədalət Partiyasının (PiS) siyasətçiləri panel müzakirəsi zamanı Ukraynanın xarici işlər naziri Dmitri Kulebanın eksqumasiya və "Visla” əməliyyatı məsələsi ilə bağlı sözlərinə bir sıra qəzəbli şərhlərlə reaksiya veriblər.

Qaynarinfo xəbər verir ki, bu barədə Rzeczpospolita məlumat yayıb.

Qəzəbə səbəb Kulebanın polşalı həmkarı Radoslav Sikorski ilə birlikdə olduğu Olştin şəhərindəki "Campus Polska Przyszłości" tədbirində panel müzakirəsi zamanı söylədiyi sözləri olub.

Sual-cavab zamanı dinləyicilərdən hər iki nazirin Ukrayna və Polşa arasında münasibətləri zəhərləməkdə davam edən tarixi məsələlərlə bağlı gərginliyi azaltmağın yollarını necə gördükləri soruşulub.

Radoslav Sikorski cavabında deyib ki, "ya qonşuların keçmişdə bir-birinə nə etdiyindən narahat olmaq olar və belə mövzular həmişə çox olacaq, ya da gələcəkdə bunun qarşısını almaq və ümumi düşmənlə necə mübarizə aparmaq barədə düşünmək olar”.

O əlavə edib ki, onun fikrincə, o və Kuleba öz işləri ilə Polşa-Ukrayna münasibətlərinin gələcəyinə sərmayə qoyurlar və bu, Aİ-də ümumi gələcəkdir.

Kuleba cavabında qeyd edib ki, Polşa-Ukrayna keçmişi çətin olub və Rusiya bu cür tarixi məsələləri öz maraqlarına uyğun şişirtmək fürsətini əldən vermir.

Bundan sonra Kulebadan Ukraynanın 1943-45-ci illərdə Volındakı hadisələr zamanı həlak olanların eksqumasiyasına qoyulan qadağanı nə vaxt aradan qaldıracağı soruşulub.

Kuleba cavabında dinləyicinin 1947-ci ildə ukraynalıların Polşanın başqa bir hissəsinə məcburi köçürülməsi üçün "Visla” əməliyyatından xəbəri olub-olmadığını soruşub və əməliyyatın aparıldığı yerlərdən Ukrayna torpağı kimi bəhs edib.

"Biz tarixin dərinliyinə gedib polyakların ukraynalılara, ukraynalıların isə polyaklara etdiyi bütün pislikləri xatırlamağa başlaya bilərik, ancaq gəlin bu sualları tarixçilərin öhdəsinə buraxaq”, - deyə Kuleba bildirib.

O, Sikorski ilə eksqumasiya məsələsini müzakirə etdiyini və Ukraynanın icazə verilməsinin əleyhinə olmadığını, lakin ukraynalıların xatirəsini ehtiramla yad etmək üçün Polşa hakimiyyətindən öz xahişləri olduğunu və bundan sonra da qarşılıqlı addım atacağını davam etdirib.

"Ukraynanın xarici işlər naziri Dmitri Kuleba Lublin, Subkarpatiya və Kiçik Polşa ərazilərini "Ukrayna torpaqları” adlandırıb, bu, görünməmiş bir hadisədir”, - deyə PiS-in keçmiş baş naziri Beata Şidlo qəzəblənib və əlavə edib ki, Polşanın göstərdiyi bütün yardımlardan sonra bu, etinasızlıq kimi görünür. "Cənab Kuleba, siz sadəcə səhv etmirsiniz, hətta axmaq bir şey edirsiniz", - o deyib.

PiS deputatı Yanuş Kovalski Kulebanın sözlərini "qalmaqallı və təftişçi” adlandırıb və bildirib ki, ukraynalı nazirin Polşaya girişi qadağan edilməli, Varşava isə eksqumasiya məsələsini Kiyevlə münasibətlərdə bir nömrəli mövzuya çevirməlidir. O, həmçinin Kulebanın sözlərinə reaksiya vermədiyi və bu cür davranışı ilə "Polşanı alçaltdığı” üçün Sikorskiyə hücum edib.

Əvvəlki hökumət dövründə Polşa Xarici İşlər Nazirliyinin keçmiş nümayəndəsi Lukasz Jasina deyib ki, Ukrayna "polyakları özünə qarşı çevirmək üçün çox şey edir” və Polşa hökuməti Ukraynaya kömək etmək üçün ictimai dəstək almalıdır.

"Bizim Polşa-Ukrayna münasibətlərinin gələcəyi ilə bağlı ciddi, qeyri-emosional müzakirəyə başlamağın vaxtı çatıb”, - o əlavə edib.

Çelmin meri eyni zamanda PiS-in nümayəndəsi Yakub Banaszek Ukraynaya böyük simpatiya bəslədiyini, lakin Kulebanın sözlərindən sonra "həqiqətdə tam barışıq olmayacağını” hiss edib.

O qeyd edib ki, "Visla” əməliyyatı baş verməməli idi. "Ancaq bunu Volında soyqırımla eyniləşdirmək və bu kontekstdə Ukrayna ərazilərindən danışmaq mənfurdur", - mer deyib.

Alpər