Milyarder İlon Mask "OpenAI"a qarşı qaldırdığı məhkəmə iddiasını daha da genişləndirərək, bu dəfə şirkətin işçilərinə ödənilən maaşlarla bağlı narazılıq edib.

Qaynarinfo xəbər verir ki, Maskın iddiasına "Microsoft" və həmçinin onun idarə heyətinin üzvü, eyni zamanda keçmiş "OpenAI" idarə heyəti üzvü Reid Hoffmanı da əlavə edib. Qeyd olunur ki, "Microsoft" keçən il açıqladığı 10 milyard dollarlıq sərmayə daxil olmaqla, indiyədək "OpenAI"a təxminən 14 milyard dollar vəsait yönəldib.

İlon Mask 2015-ci ildə "OpenAI"ın qurucuları arasında olub, lakin həmin dövrdən etibarən şirkətlə əlaqələrini tamamilə kəsib. Daha sonra o, "OpenAI"ın ən sərt tənqidçilərindən birinə çevrilib. 2018-ci ildə "OpenAI"ın idarə heyətindən ayrılan Mask ötən il öz süni intellekt şirkəti olan "xAI"ı təsis edib.

Maskın şikayətində iddia olunur ki, "OpenAI" və "Microsoft" süni intellekt bazarını öz nəzarətlərinə götürmək məqsədilə "geniş maaşlar” təklif edərək, rəqabət qaydalarına zidd davranıblar. Şikayətdə qeyd olunur:

"OpenAI" səxavətli maaş təklifləri ilə işçi cəlb etməkdə aqressiv yanaşma sərgiləyərək, rəqiblərinin süni intellekt istedadlarını əllərindən almağa çalışır. Şirkət cəmi 1.500 işçi üçün 1,5 milyard dollarlıq xərc çərçivəsində fəaliyyət göstərir".

"OpenAI" xüsusi bir şirkət olduğundan, digər ictimai şirkətlər kimi maaş məlumatlarını açıqlamaq məcburiyyətində deyil. Lakin mövcud məlumatlar bu barədə bəzi detallar təqdim edir.

Texnologiya şirkətləri və startaplarda maaş məlumatlarını izləyən "Levels.fyi" platformasının məlumatına görə, "OpenAI"da bir texniki yazıçı üçün illik ümumi maaş təxminən 144 min dollar təşkil edir. Bu rəqəm bir proqram mühəndisi üçün isə 1,3 milyon dollara qədər yüksələ bilir. Ümumilikdə, şirkətdə bildirilən illik orta maaş 534 min dollar civarındadır.

Xüsusilə proqram mühəndisləri üçün "Levels.fyi"də göstərilən orta illik maaş "OpenAI"da 810 min dollar təşkil edir. Platforma əsasən istifadəçilərin təqdim etdiyi məlumatlardan istifadə etdiyini, lakin bəzi maaşların iş təklif məktubları və ya ödəniş sənədləri kimi materiallarla təsdiqləndiyini bildirir.

Maaş müqayisəsi aparan "Comprehensive.io"nun qurucusu Rocer Li isə ötən il "Bloomberg"ə verdiyi açıqlamada "OpenAI"ın mühəndislik üzrə ən yayğın maaş aralığının, səhm mükafatları və ya bonuslar istisna olmaqla, 200-370 min dollar arasında dəyişdiyini deyib. O, daha ixtisaslaşmış mövqelər üçün bu rəqəmin 300-450 min dollar və ya daha yüksək ola biləcəyini qeyd edib.

İlon Mask ilk dəfə mart ayında "OpenAI" və onun təsisçiləri Sem Altman və Qreq Brokman haqqında iddia qaldıraraq, şirkəti "Microsoft" ilə əməkdaşlıq vasitəsilə qeyri-kommersiya məqsədindən uzaqlaşmaqda günahlandırmışdı. "OpenAI" bu iddiaya "məntiqsiz" və "ziddiyyətli" kimi cavab verib.

Maskın avqust ayında qaldırdığı son iddiada isə o, "OpenAI"ın artıq insanlıq üçün faydalı süni intellekt yaratmaqdan çox kommersiya maraqlarını üstün tutduğunu və şirkət qurularkən "aldadıldığını" iddia edib. 2019-cu ildə məhdud mənfəət modelinə keçən "OpenAI" 2023-cü ilin sentyabr ayında kommersiya yönümlü idarəetmə strukturuna doğru irəlilədiyini açıqlamışdı.

Aydın