Mişel, fon der Lyayeni əsas vəzifələrin müzakirəsindən kənarlaşdırmaq istəyir

Qaynarinfo xəbər verir ki, bu barədə "Politico” mənbələrə və avropalı diplomatlara istinadən yazır.

İyunun 17-də qeyri-rəsmi sammitin keçirilməsi planlaşdırılır. Nəşrin məlumatına görə, görüş üçün iştirakçıların seçilməsinə Mişel rəhbərlik edir. Aİ liderləri və onların köməkçiləri ilə söhbətlərində o, fon der Lyayenin görüşə dəvət edilməməsini təklif edib, çünki o, həm də Avropa Xalq Partiyasının (EPP) aparıcı namizədidir və ikinci müddətə AK rəhbəri olmaq istəyir.

Politico-ya görə, bəzi rəsmilər Şarl Mişelin "Aİ-nin növbəti xarici siyasət rəhbəri olmaq üçün yarışa girmək planına sahib olduğundan" şübhələnirlər. Nəşrin həmsöhbətlərindən birinin fikrincə, Aİ Şurası rəhbərinin davranışı "bəzi qıcıqlara” səbəb olur. "Aİ-yə üzv ölkələr Şarl Mişelin AK sədri vəzifəsinə seçim prosesində rolundan getdikcə daha çox qıcıqlanır. Görünür, o, sırf şəxsi motivləri rəhbər tutur”, – adının açıqlanmasını istəməyən avropalı diplomat bildirib.

Xatırladaq ki, Ursula fon der Lyayen seçkinin nəticələrinə görə 720 yerlik Avropa Parlamentində yerlərin əksəriyyətini toplayan mühafizəkar sağ mərkəzçi Avropa Xalq Partiyasının üzvüdür. Nəticədə 137 avropalı deputatın təmsil olunması bu fraksiyanın Aİ Şurasının gələcək rəhbəri vəzifəsinə öz namizədini irəli sürmək şansını gücləndirir. Bu vəzifə üçün ən azı iki siyasətçinin - Portuqaliyanın keçmiş baş naziri, sosialist Antonio Kosta və Danimarkanın hazırkı baş naziri Mette Frederiksenin mübarizə apardığı güman edilir.