Tahir Süleymanov: “Ştuxlikin Azərbaycana gətirilməsi hakimlik adına yolverilməz idi”

Keçmiş FİFA referisi, Qaynarinfo-ya açıqlamasında düşüncələrini bu şəkildə bölüşüb:

"Futbol adına hər bir mühüm təyinat zamanında təhlil edilib, əsaslandırılaraq həyata keçirilməlidir. Hakimlik sahəsi futbolun aparıcı qollarından biridir və çox həssas yanaşma tələb edir. AFFA strateji olaraq illərdi, yumşaq desək, səhvlər edir. Bu, idarəçilikdə, milli, yığmalar səviyyəsində, uşaq futbolunda, ümumi futbola baxışda özünü mənfi tərəfdən göstərir. Futbol təsərrüfatının dirçəlməsi üçün kompleks addımların atılması, köklü islahatların aparılması zərurəti çoxdan yetişib”.

"Hakimliklə bağlı 4 il də itirildi. 2018-ci də Ştuxlikin təyinatına münasibətimi bildirmişəm. Komitədə təmsil olunmağım AFFA tərəfindən təklif olunsa da, israrla istənilsə də, yanlış yolda olduqlarını bildirərək qəti mövqeyimi bildirmişəm. Biz öncədən bilirdik, zaman futbol ictimaiyyətinə də göstərdi ki, avstriyalı mütəxəssisin Azərbaycana gətirilməsi nəinki hakimlik adına, mənəvi olaraq da yolverilməz idi. Futbolun əksər sektorlarında, hakimlik də daxil olmaqla, işlər yenidən qurulmalıdır. Mətbuatda bu haqda geniş açıqlamalarım olub, təkrarçılığa yol vermək istəmirəm. Ştuxlik kimilər öz yerində, onları ölkə futboluna gətirənlər müzakirə edilməlidir. Yoxsa yeni-yeni ştuxliklər, lippertlər yenidən AFFA-nı zəbt edəcəklər. Öncə, Azərbaycan futbolunu şəxsi məqsədlər üçün istifadə edən cavabdehlər göndərilməlidir”.