4-7 may tarixlərində keçiriləcək "Prezident Kuboku -2023” beynəlxalq reqatasından öncə komandaların rəhbər şəxslərinin, nümayəndələrinin və beynəlxalq dərəcəli hakimlərin iştirakı ilə iclas keçirilib. Toplantı zamanı komanda nümayəndələrinə yarışın reqlamenti, iştirak qaydaları barədə ətraflı məlumat verilib.

Mayın 4-də Ümummilli Lider Heydər Əliyevin anadan olmasının 100 illik yubileyinə həsr olunan avarçəkmə üzrə "Prezident Kuboku-2023” beynəlxalq

reqatasına start verilib. Gənclər və İdman Nazirliyi və Azərbaycan Kanoe və Avarçəkmə Federasiyası tərəfindən birgə təşkil edilən, Avropa Kanoe Assosiasiyasının rəsmi təqdim planında yer alan reqatada 17 ölkədən 100-dən artıq idmançı mübarizə aparır.

Beynəlxaq yarışın açılış mərasimi və ilk yarış günü tarixi torpağımız Suqovuşanda təşkil olunub. Açılış mərasimində gənclər və idman naziri Fərid Qayıbov, nazir

müavini Mariana Vasileva, Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası

Prezidentinin xüsusi nümayəndəsinin müavini Bəşir Hacıyev, Azərbaycan Kanoe və Avarçəkmə Federasiyasının (AKAF) rəhbəri Vüqar Əhmədov, eləcə də yerli və

xarici idman federasiyalarının rəhbər şəxsləri iştirak ediblər.

Mərasim hərbi orkestrin ifasında Azərbaycan Respublikasının dövlət himninin səsləndirilməsi ilə başlayıb.

Açılış nitqi ilə çıxış edən AKAF rəhbəri Vüqar Əhmədov qonaqları və yarış iştirakçılarını salamlayaraq bildirib ki, beynəlxalq reqatanın 100 illlik yubileyini qeyd etdiyimiz Ümummilli Lideri Heydər Əliyevin təşəbbüsü ilə 1976-cı ildə inşa edilən Suqovuşan su anbarında start götürməsi özlüyündə rəmzə məna daşıyır.

Yarışın növbəti 2 gününün Mingəçevir şəhərindəki "Kür” Olimpiya Tədris-İdman Mərkəzində, bağlanış mərasiminin isə Bakı Bulvarında təşkil olunacağını deyən

Federasiya rəhbəri iştirakçı ölkə idmançılarına uğurlar arzulayıb.

"Qarabağa həyat qayıdır, işğaldan azad olunmuş torpaqlar önəmli beynəlxalq tədbirlərə ev sahibliyi edir. Biz qalib ölkənin vətəndaşlarıyıq və bu, hər zaman bizə

doğru yolu göstərəcək” – deyən Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası

Prezidentinin xüsusi nümayəndəsinin müavini Bəşir Hacıyev yarışın Ulu Öndər Heydər Əliyevin 100 illik yubileyinə həsr olunmasını və Suqovuşan su anbarında

təşkil edilməsini olduqca önəmli hadisə adlandırıb.

Gənclər və idman naziri Fərid Qayıbov Suqovuşan qəsəbəsində artıq 3-cü dəfə təşkil olunan beynəlxalq yarışda hər dəfə iştirakçı ölkələrin sayının artdığını

vurğulayıb. Tədbirin beynəlxalq standartlara uyğun təşkil edildiyini bildirən Fərid Qayıbov deyib ki, bu cür təşkilatçılıq dövlətin dəstəyi olmadan mümkün deyil və

Azərbaycan idmançıları hər zaman prezident İlham Əliyevlə birinci vitse-prezident Mehriban Əliyevanın diqqət və qayğısını hiss edirlər. İdmançılara uğurlar

arzulayan nazir "Prezident Kuboku-2023” reqatasını açıq elan edib.

İlk yarış günündə kayak və kanoe üzrə 200 metr məsafəyə mübarizədə qaliblər müəyyənəşib. Azərbaycan idmançıları reqatanın birinci günündə 1 qızıl, 1 gümüş

və 3 bürünc medal əldə ediblər.

Günün ikinci yarısında Mingəçevir şəhərində reqatanın rəsmi paradı təşkil olunub. Parad zamanı iştirakçı ölkə komandaları çaparlar və maskotların müşaiyəti ilə

Heydər Əliyev prospekti ilə irəliləyərək tamaşaçıları salamlayıblar. Komandaların keçidindən sonra Ümummilli Lider Heydər Əliyevin Mingəçevir şəhərində

ucaldılan abidəsi ziyarət edilib və önünə gül dəstələri düzülüb.

"Prezident Kuboku-2023” reqatası mayın 5-6-da Mingəçevir şəhərindəki "Kür” Olimpiya Tədris-İdman Mərkəzində davam edəcək. Beynəlxalq turnirin bağlanış

mərasimi mayın 7-də Bakı Bulvarındakı "Milan Expo” mərkəzində baş tutacaq.

Tədbir zamanı tamaşaçıları möhtəşəm şou proqram, xalq artisti Miri Yusifin solo konserti və möhtəşəm atəşfəşanlıq gözləyir.