Qərbin Ukraynaya bütün silahları verməməsinin iki səbəbi açıqlandı: birincisi Merkel...

Qaynarinfo "Pravda"ya istinadla xəbər verir ki, Reznikov bu barədə bazar günü İspaniyanın "La Razon” qəzetinə müsahibəsində bildirib.

Nə üçün Qərbin Ukraynaya bütün lazımi silahları hələ də vermədiyi sualına cavab verən nazir deyib ki, Qərb "uzun müddətdir ki, Rusiyanı təxribat etməmək doqması altında yaşayır” ki, bu, 2008-ci ildə NATO-nun Buxarest sammiti zamanı xüsusilə nəzərə çarpıb.

"Bundan sonra Ukrayna və Gürcüstanın Alyansın yeni üzvləri olma ehtimalı çox real idi. Əksər avropalılar kimi amerikalılar da bunun tərəfdarı idi. Yalnız Almaniya kansleri Angela Merkel buna qarşı çıxdı və başqalarını da inandırdı", - o xatırladıb. Reznikov əlavə edib ki, bundan sonra Gürcüstanın bir hissəsinin, Krımın, Donetsk və Luqansk vilayətlərinin bir hissəsinin işğalı, eləcə də Çexiya və Bolqarıstanda anbarlarda partlayışlar və Solsberidə zəhərlənmələr baş verib, "yenə də  eyni doktrina: Rusiyanı təhrik etməyin”.

"(Qərbin - red.) ikinci səhvi o idi ki, onlar hesab edirdi: əgər hərbi toqquşma olarsa, o zaman kiçik Sovet ordusu daha böyük ordu ilə qarşılaşacaq və məğlub olacaq. Axı biz sovet ordusu olan sovet ölkəsi deyilik”, - o qeyd edib.

Eyni zamanda Reznikov bildirib ki, hazırda Almaniyanın göstərdiyi yardımın səviyyəsindən "məmnundur”.

"Onları daha cəsarətli olmağa inandırmaq üçün çox iş lazımdı, amma biz bunu bacardıq. Səbəblərini başa düşürəm. Nürnberq sınaqlarından sonra onlar pasifist ölkə oldular, dəyişdilər. Nürnberq-2 baş tutsa və hərbi cinayətkarlar mühakimə edilsələr, bu, Rusiyanın da başına gələ bilər”, – müdafiə naziri bildirib.

Bildiyiniz kimi, 2008-ci ildə NATO-nun Buxarest sammitində Almaniya və Fransa Rusiyanın eskalasiyasından ehtiyat edərək, Ukraynaya, eləcə də Gürcüstana NATO-ya üzvlük fəaliyyət planının verilməsinə mane olmuşdular. O vaxtdan bəri Alyans bu ölkələrin ikisinə də yalnız hansısa "bir gün” onların Alyansa daxil olacağına söz verib.

Ukraynaya genişmiqyaslı işğaldan sonra Merkel həmin tarixi qərarının Rusiyanın təcavüzünə səbəb ola biləcəyini etiraf etməkdən boyun qaçırıb.