Albaniya parlamenti post-kommunist ölkənin ilk prezidenti və keçmiş baş naziri Sali Berişanı siyasi toxunulmazlıqdan məhrum edib. Əslində, bu, onu korrupsiyada ittiham edən Xüsusi Prokurorluğun tələbi ilə həbsinə icazə verilməsi deməkdir. Eks-prezidentin qarşıdan gələn həbsi nəinki Albaniyanın müasir tarixində presedent yaradacaq, həm də yerli ekspertlərin fikrincə, Sali Berişanın başçılıq etdiyi müxalif Demokrat Partiyasının, eləcə də müxalifətin xeyli zəifləməsinə, baş nazir Edi Ramanın hakim sosialistlərinin mövqelərinin daha da güclənməsinə gətirib çıxaracaq.

Qaynarinfo xəbər verir ki, bu barədə "Kommersant" yazır.

Albaniya parlamenti ötən həftənin sonunda Sali Berişanın siyasi toxunulmazlıqdan məhrum edilməsinə səs verib. Səsvermə Xüsusi Prokurorluğun oktyabr ayında post-kommunist Albaniyanın birinci prezidentini və ölkənin keçmiş baş nazirini (Sali Berişa bu vəzifəni iki dəfə, 2005-2013-cü illərdə tutub) onun dövründə korrupsiyada ittiham edən sorğusuna cavab olub.

Xüsusi Prokurorluğun məlumatına görə, Sali Berişa kürəkəni Yamarber Maltesiyə Müdafiə Nazirliyinə məxsus paytaxt Tiranada yerləşən "Partizan” klubunun idman bazasının ərazisini qanunsuz olaraq almağa və onun ərazisində 17 çoxmərtəbəli yaşayış binası tikməyə kömək edib.

Keçmiş prezidentin kürəkəni oktyabrda ittihamlar irəli sürüləndən dərhal sonra həbs edilib. Sali Berişanın özü siyasi toxunulmazlığı olduğundan Xüsusi Prokurorluq üçün əlçatmaz olub, toxunulmazlıqdan yalnız parlament onu məhrum edə bilərdi. Deputatların ötən həftənin sonunda səsverməsi keçmiş prezidentin həbsinə yol açıb.

Sali Berişanın rəhbərlik etdiyi müxalif Demokrat Partiyasından olan deputatlar toxunulmazlığın ləğvi üçün səsvermənin qarşısını almağa çalışıblar. Onlar parlamentin tribunasını yandırmaq niyyətində olublar və orada stulları üst-üstə yığıblar, bir neçə uğursuz cəhddən sonra məşəl alovlandırıblar. Parlamentdəki yanğının qarşısı təhlükəsizlik xidməti tərəfindən alınıb. Bundan sonra parlamentdəki 140 mandatdan 74-nə sahib olan baş nazir Edi Ramanın hakim Sosialist Partiyasından olan deputatlar Sali Berişanı toxunulmazlıqdan məhrum etməyə səs veriblər.

Postkommunist Albaniyanın ilk prezidentinin yaxın gələcəkdə demək olar ki, qaçılmaz həbsi təkcə onun yaxın tarixində presedent olmayacaq. Alban ekspertlərinin fikrincə, bu, respublikadakı siyasi vəziyyəti xeyli dəyişəcək.

1990-cı ildə Ənvər Hoca və onun varisi Ramiz Əliyanın avtoritar rejiminə qarşı nümayişlərdən sonra Sali Berişa tərəfindən yaradılmış və 1992-ci ildə Berişanın post-kommunist Albaniyanın ilk prezidenti olmasına kömək edən Demokratik Partiya indi tənəzzüldədir. İki il öncə əvvəlcə ABŞ, sonra isə Böyük Britaniya Sali Berişaya sanksiya tətbiq etdikdə, ona və ailə üzvlərinə onların ərazisinə giriş qadağan edildikdən sonra əsas müxalifət qüvvəsi parçalanıb. Və Sali Berişa partiya üzərində nəzarəti qoruyub saxlaya bilsə də, onun ölkədəki mövqeyi kəskin şəkildə zəifləyib və bir vaxtlar minlərlə adamın iştirak etdiyi mitinqlər əvəzinə indi o, ancaq parlamentdə dava-dalaş təşkil edə bilir. 79 yaşlı liderin gözlənilən həbsi partiya üçün yeni zərbə olacaq.

"Bu gün Albaniyada siyasi alternativ yoxdur. Baş nazir Edi Rama həmişəkindən daha güclüdür. Yalnız Xüsusi Prokurorluq onun hakimiyyətinə qarşı çıxır”, deyə alban politoloq Lütfi Dərvişi bildirib.

Onun sözlərini sentyabrda keçmiş ətraf mühitin mühafizəsi nazirinin həbsə məhkum edilməsi, sosialist hökumətində baş nazirin keçmiş müavininin ona qarşı korrupsiya ittihamı irəli sürüldükdən sonra tələsik ölkəni tərk etməsi də təsdiqləyə bilər.

Nizami Bağırov