RİNN nümayəndəsi nüfuzlu beynəlxalq təşkilatda proqram meneceri təyin olundu

Qaynarinfo xəbər verir ki, Ümumdünya Poçt İttifaqı (ÜPİ) ilə aparılan danışıqlar nəticəsində "Azərpoçt” MMC-nin Beynəlxalq daşımalar departamentinin müdiri Anar Məcidov 4 mart tarixindən etibarən ÜPİ-nin Avropa və MDB ölkələri üzrə proqram meneceri vəzifəsində çalışmağa başlayıb. Anar Məcidov sözügedən vəzifədə çalışdığı müddətdə təşkilatın Avropa və MDB ölkələrində həyata keçiriləcək texniki əməkdaşlıq proqramları və layihələri ilə əlaqədar işin təşkili və qiymətləndirilməsini aparacaq.

Azərbaycan nümayəndəsinin belə yüksəknüfuzlu beynəlxalq təşkilatda mühüm vəzifəyə qəbul olunması ölkəmizin ÜPİ ilə apardığı uzunmüddətli və sıx əməkdaşlığının təzahürüdür. ÜPİ ilə Azərbaycan arasında səmərəli əməkdaşlıq əsasında qurulan əlaqələr regionda və dünya miqyasında poçt xidmətlərinin inkişafına və modernləşdirilməsinə mühüm təsir göstərir. Yeni təyinat isə, öz növbəsində, bütün regionda əməkdaşlığın daha da genişlənməsinə, ölkədə beynəlxalq təcrübənin artırılmasına, əlavə layihələrin və proqramların təşviqinə, habelə ÜPİ-nin Avropa və MDB ölkələri üzrə fəaliyyətlərinin daha da inkişafına əlavə imkanlar yaradacaq.

Bu təyinat tərəflərin poçt sektorunda əməkdaşlığı gücləndirmək üçün səylərinin növbəti mərhələsidir. Yeni mərhələ qarşıda dayanan perspektivlər istiqamətində əməkdaşlığın daha da möhkəmlənməsi və poçt xidmətlərinin müasir standartlara cavab verməsinin təmin edilməsi üçün möhkəm əsas yaradır.