Qaynarinfo xəbər verir ki, bu barədə "Sota" "Telegram" kanalı Rusiya Federasiyası İstintaq Komitəsi və Navalnının ətrafında olan mənbələrə istinadən yazır.

İstintaq Komitəsindəki iki yüksək rütbəli mənbənin bir-birinin xəbərlərini təsdiqlədiyinə görə, Navalnının qətlinin əsas "lobbiçisi" 2012-ci ildə haqqında araşdırma apardığı vaxtdan siyasətçiyə şəxsi nifrət bəsləyən İstintaq Komitəsinin rəhbəri Aleksandr Bastrıkin olub.

Mənbələr bildirir ki, Navalnının həbsindən sonra Bastrıkin onu koloniyada öldürmək üçün Putindən sanksiya istəyib və nəticədə Federal Penitensiar Xidmətin rəhbəri Arkadi Qostevin dəstəyini qazanıb. Mənbələrə görə, sonuncu Navalnının həbsdə olduğu müddətdə çoxsaylı yazılarına görə Bastrikinlə razılaşıb. Eyni zamanda, bu səbəbdən Navalnının vəkillərinə qarşı cinayət işi açılıb.

Nəticədə, 2023-cü ilin avqustunda Vladimir Putin Bastrikinin 70 illik yubileyinə "hədiyyə" olaraq Aleksey Navalnının yavaş-yavaş zəhərlənməsinə icazə verib. İlkin plana görə, siyasətçinin 2023-cü ilin sonuna qədər ürək-damar problemlərindən öləcəyi güman edilib, lakin ölüm yalnız fevralın 16-da baş verib.

"Sota"nın mərhum siyasətçiyə yaxın mənbəsinin sözlərinə görə, o, koloniyadan mesajlar göndərib ki, onun fikrincə, hansısa zəhər qəbul edir.

"Qütb canavarı" 3 saylı cəzaçəkmə koloniyasının məhbusu adının açıqlanmaması şərti ilə "Novaya qazeta Europe" nəşrinə bildirib ki, siyasətçi Aleksey Navalnı ehtimal ki, Federal Penitensiar Xidmətin elan etdiyi vaxtdan xeyli tez vəfat edib.

Onun sözlərinə görə, 15 fevral axşam müəssisədə anlaşılmaz bir hay-küy başlayıb, axşam saat 20:00-dan 20:30-a qədər keçirilən yoxlama çox sürətləndirilib. Sonra hamını baraklara salıblar və heç bir hərəkət etməmək barədə xəbərdarlıq ediblər, eyni zamanda təhlükəsizlik tədbirləri gücləndirilib.

"Axşam və gecə üç dəfə avtomobillərin zonaya daxil olduğu eşidildi, lakin pəncərədən hansı maşınlar olduğunu görə bilmədik", deyə məhbus bildirib.

Məhbusun sözlərinə görə, fevralın 16-da səhər "şmon"la başlayıb: koloniya işçiləri əvvəllər göz yumduğu bir neçə mobil telefon, kart, eləcə də su qızdırıcısını müsadirə ediblər. Mühafizəçilərin sözlərindən məhbuslar belə nəticəyə gəliblər ki, koloniya yoxlama gözləyir. Eyni zamanda, nəşrin həmsöhbəti qeyd edib ki, rəhbərlik adətən bu cür yoxlamalar barədə bir ay əvvəldən xəbər tutur və onlara əvvəlcədən hazırlaşır.

O, əlavə edib ki, Aleksey Navalnının koloniyada ölümü təxminən səhər saat 10-da (Bakı vaxtı ilə 09:00) məlum olub. Siyasətçinin saxlandığı kamera baraklardan kənarda yerləşir, lakin onun yaxınlığında təcili yardım maşınları olmayıb: təcili yardım maşınının müxalifətçinin ölümünün elan edilməsindən sonra peyda olduğu bildirilir.

"Düşünürəm ki, Navalnı elan edilən vaxtdan çox tez ölüb. Çox güman ki, dünən gecə. Yoxsa bizi baraklarda möhkəm bağlayıb səhər axtarışı təşkil etmək nəyə lazım idi?", deyə məhbus qeyd edib.

Eyni zamanda, o, Navalnının ölümünün koloniya rəhbərliyi üçün sürpriz olduğunu qeyd edib. Onun sözlərinə görə, səhər tezdən koloniyanın rəisi, həm də koloniyanın əməliyyat hissəsinin rəhbəri çaşqınlıq içində olub.

O, həmçinin bildirib ki, koloniyada komissiyanın gəlməsini Navalnının ölümü ilə eyni vaxtda öyrəniblər. Məhbusun sözlərinə görə, bu, siyasətçinin elan ediləndən xeyli tez öldüyünə bir daha sübutdur.

Aleksey Navalnının ölümündən dərhal sonra müxalifətçinin tezliklə dəyişdirilə biləcəyinə dair ehtimal irəli sürülüb. "Bild"in məlumatına görə, əslində belə danışıqlar olub və danışıqlarda Moskva, Vaşinqton və Berlin iştirak edib.

Putin Almaniyada həbsdə olan rus agenti Vadim Krasikovu geri qaytarmaq istəyib. Bunun müqabilində Putinin Navalnını azad edəcəyi müzakirə olunub.

"Bild"in köşə yazarı Filip Pyatov yazır: "Aleksey Navalnı azadlığa çıxmaq üzrə idi".

Rusiya Federasiyası Federal Penitensiar Xidmətin rəsmi məlumatına görə, fevralın 16-da Aleksey Navalnı gəzintidən sonra özünü pis hiss edib və huşunu itirib. "Lazımi reanimasiya tədbirləri" müsbət nəticə verməyib, "təcili yardım həkimləri onun öldüyünü elan edib".

"Baza"nın məlumatına görə, Navalnı cümə günü yerli vaxtla saat 13:00 radələrində (Moskva vaxtı ilə 12:00) özünü pis hiss edib. Onun üçün təcili yardım çağırılıb, həkimlər siyasətçini həyata qaytarmağa çalışıblar, lakin o, yerli vaxtla saat 14:17-də ölüb.

Nizami Bağırov