İrlandiyanın baş naziri: "İsrailin özünü müdafiə etmək hüququ var, amma..."

Qaynarinfo "Yevropeyska pravda"ya istinadən xəbər verir ki, bu barədə RTE məlumat yayıb.

Qəzza səhiyyə orqanlarının bildirdiyinə görə, İsrail oktyabrın 7-də HƏMAS yaraqlılarının hücumlarına cavab olaraq 2,3 milyon insanın yaşadığı anklava hücuma başladıqdan sonra ən azı 9061 nəfər ölüb.

 

"Mən qəti şəkildə inanıram ki, İsrailin özünü müdafiə etmək hüququ, bir daha bunu edə bilməsin deyə HƏMAS-ı məhv etmək hüququ var", deyə Varadkar Cənubi Koreyaya səfəri zamanı jurnalistlərə qeyd edib.

"İndi gördüklərim təkcə özünümüdafiə deyil. Bu, daha çox qisas almağa bənzəyir və bu, bizim olmamız lazım olan yer deyil və düşünmürəm ki, İsrail gələcək azadlığını və təhlükəsizliyini belə təmin edəcək", deyə Varadkar bildirib.

Jurnalistin İsrailin hərəkətlərinin hərbi cinayətlərə aid olub-olmaması ilə bağlı sualını cavablandıran Varadkar bildirib ki, bunu müəyyən etmək onun səlahiyyətində deyil.

Qeyd edək ki, İsrail beynəlxalq hüquq çərçivəsində hərəkət etdiyini və hücumlarını mülki şəxslərin arxasında həyata keçirən HƏMAS-ı məhv etmək məqsədi daşıdığını təkid edir. Qəzzadakı müharibə Aİ daxilində xarici siyasətdə parçalanmaları önə çəkib. Fransa, Niderland, İspaniya, Portuqaliya, Belçika və İrlandiya kimi ölkələr BMT-nin humanitar əsaslarla münaqişənin dayandırılması çağırışlarını dəstəkləyib. Lakin Almaniya, Çexiya və Avstriya kimi digər ölkələr müqavimət göstərərək, belə bir addımın İsrailin özünü müdafiə etmək imkanlarını məhdudlaşdıra biləcəyini və HƏMAS-ın yenidən qruplaşmasına imkan yarada biləcəyini iddia edir. 

İrlandiya ənənəvi olaraq Qərbi Avropada İsrailin fələstinlilərə qarşı siyasətinin ən sərt tənqidçilərindən biri olub.

Nizami Bağırov