Yığmamızın sabiq qapıçısı: “Mən də olsam, meydana onu buraxardım”

Yığmamızın sabiq qapıçısı Hüseyn Məhəmmədov Qaynarinfo-ya açıqlamasında İmanovun çıxışını dəyərləndirdi:

"Bu oyunda qapıçının üzərinə düşən qəbahətli bir şey yoxdur. Oyun ərzində onda hər hansı sıxıntı narahatlıq görmədim. Sadəcə, qapıçı kimi məsuliyyət gördüm. Üzərində məsuliyyət hiss edirdi. Məşqçi mən də olsam, Yusifi meydana buraxardım. Çünki uzun müddətdir "Sabah”ın əsas heyətində oynayır. Oyunlarda da rahat görünür. Qaldı ki, məşqçinin onu ya bu, ya da növbəti oyunda meydana buraxmasına, fərq etməz. Kimliyindən asılı olmayaraq, baş məşqçi hazır qapıçıya şans verməyi önəmli sayır. Belə də olmalıdır. Yusifdə gördüyüm müsbət məqamlar, oyunu başlatması, meydanda özünü daha sərbəst aparması idi. Əsas odur ki, təlaş, hay-küy yox idi. Məsuliyyət hiss edirdi”.

"Avstriya ilk qolu kombinasiya ilə vurdu. İkinci qolda topu qapıçının tuta biləcəyini deyirlər. Düzgün analiz etmək lazımdır. Hansı qapıçıya deyə bilərsən ki, təkbətək mübarizədən qalib ayrılmalısan? Bu, 99 faiz mümkün deyil. Təkbətəklər zamanı üstünlük 80-nin 20-yə faiz nisbəti ilə hücumçuda olur. Üçüncü qolda Yusif topa tullansa da, əlinə dəydi və qapıya getdi. Cərimə zərbəsi zamanı top canlı səddin üstündən qapıya daxil olursa, buna görə qapıçıya irad tutmaq yersizdir. Bu, futbolun qanunudur. Dördüncü qolun da necə vurulduğunu gördünüz. Oyun ərzində Yusif bir neçə dəfə komandanı qoldan xilas etdi ki, bu da yaxşı haldır. İnşallah gələn oyunda daha sərbəst olar. Canni De Byazinin bu gün ona etibar etməsi çox yaxşı haldır”.