Federal Təhqiqat Bürosunun (FTB) əməkdaşları ABŞ-ın Virciniya ştatında politoloq və "Birinci kanal”ın aparıcısı Dmitri Saymsın rançosunda axtarış aparıblar. Rayon məhkəməsinin məlumatına görə, ranço 1,63 milyon dollar qiymətləndirilib və həyat yoldaşı Anastasiya Rurikova-Saymsla birlikdə 2021-ci ildə, yəni bir neçə il Rusiyanın "Birinci kanalı”nda işlədikdən sonra alıb.

Qaynarinfo xəbər verir ki, bu barədə "Agentstvo” yerli "Rappahannock News” qəzetinə istinadən yazır.

Qəzet yazır ki, FTB agentləri çərşənbə axşamı rançoya giriblər. Büronun sözçüsü Samanta Şero istintaq hərəkətlərinin aparıldığını təsdiqləyib, lakin təfərrüatlar verməkdən imtina edib.

Sayms özü jurnalistlərə ABŞ-dan kənarda olduğunu deyib. Onun sözlərinə görə, istintaq hərəkətləri barədə ona heç bir məlumat verilməyib, hüquq-mühafizə orqanları onunla əlaqə saxlamayıb və hansısa istintaqda təqsirləndirilən şəxs olub-olmadığını bilmir. "Çaşqınlıq içindəyəm və narahatam. Mən, şübhəsiz ki, düzgün məlumat əldə etmək üçün hərəkətlər edəcəyəm və sonra düzgün tədbirlər görəcəyəm”, - Sayms bildirib.

Sayms Kremlin tanınmış politoloqudur. O, 2010-cu illərin sonundan "Birinci kanal”da "Böyük oyun” verilişinə aparıcılıq edir və 2023-cü ilin iyununda Sankt-Peterburq Beynəlxalq İqtisadi Forumunda Vladimir Putinlə sessiyaya moderatorluq edib.

Rusiyada Sayms amerikalı politoloq kimi təqdim olunur. Əslində onun əsl adı Dmitri Simisdir, o, Moskvada sovet dissidentlərinin ailəsində anadan olub, 1973-cü ildə ABŞ-a köçüb və yalnız orada Sayms olub. "Layihə” yazır ki, digər dissidentlər onun KQB ilə əlaqəsi olduğundan şübhələnirdilər.

1980-ci illərdə Sayms Riçard Niksonun qeyri-rəsmi məsləhətçisi olub. O, həmçinin Niksonun Moskvaya səfərlərini təşkil edib və 1994-cü ildə keçmiş prezidentin ölümündən bir müddət əvvəl yaratdığı sağ mərkəzçi analitik Nikson Mərkəzinə rəhbərlik edib. 2016-cı ildə o, Donald Trampın kampaniyasının qeyri-rəsmi məsləhətçisi olub. Bundan sonra Sayms Rusiyanın Amerika seçkilərinə müdaxiləsi ilə bağlı araşdırmanın fiqurlarından birinə çevrilib. Bununla belə, xüsusi prokuror Robert Müller belə qənaətə gəlib ki, Sayms Rusiya rəsmiləri ilə sıx təmasda olmasına baxmayaraq, onlardan Trampa gizli mesajlar ötürməyib.

2010-cu illərin sonlarında Sayms maliyyə sıxıntıları yaşayıb. Məhz o zaman "Birinci kanal”da "Böyük oyun" tok-şousunun aparıcısı olub. Bu ona maliyyə problemlərini həll etməyə imkan verib. 2019-cu ildə o, "Birinci kanal”dan 14 milyon rubl (217 min dollar), 2021-ci ildə isə artıq 37,8 milyon rubl (512 min dollar) alıb ki, bu da Amerika fondundakı əmək haqqı ilə müqayisə oluna bilər.

"Layihə” yazır ki, 2022-ci ildə Sayms Rusiya vətəndaşlığını alıb.

Nizami Bağırov