İpoteka və Kredit Zəmanət Fondunun (İKZF) açıqladığı məlumata görə, bu günə qədər 51 022 borcalana 3 milyard 170,738 milyon manat kredit verib. Bundan başqa indiyə qədər 481,066 milyon manat məbləğində biznes kreditlərinə zəmanət verilib, 5 272 mənzil isə kirayəyə vermək yolu ilə realizə edilib.

İpoteka və Kredit Zəmanət Fondu 2017-ci ilin sonunda "Azərbaycan İpoteka Fondu” və "Kredit Zəmanət Fondu” ASC-lərin birləşməsi nəticəsində yaradılıb.

Mövzu ilə bağlı Valyuta.az-a danışan əmlak məsələləri üzrə ekspert Elnur Fərzəliyevin sözlərinə görə, ipoteka kreditlərinin alınmasında şərtlər çətin olsa da, əlçatandır:

"Məsələn, əgər bank vətəndaşa kredit ayırırsa, mütləq şəkildə zəmanəti olmalıdır ki, kredit ayrılan şəxsin aylıq ödənişi vaxtı-vaxtında geri qaytara biləcəyinə əmin olsun. Bu dünyanın hər yerində belədir. İpoteka kreditinin üstün cəhəti isə vətəndaşın istədiyi yerdən ev ala bilməsidir. Lakin digər layihələrdə ancaq təqdim olunan evlərdən almaq olur".

Ekspertin sözlərinə görə, hər il ipoteka paketinin sayı artır, həcm böyüyür, evlərin qiyməti artdıqca, tələbat çoxaldıqca, ayrılan kreditlərin sayı artır:

"Bundan başqa İKZF vasitəsi ilə deyil, çox saylı tikinti şirkətləri də daxili kreditlə mənzil satırlar, elə fondun özünün kirayə mənzillər layihəsi var ki, bu vasitə ilə minlərlə insan mənzil sahibi olub. Tələb artdıqca, müraciət artdıqca ayrılan vəsaitlərə nəzər yetirilir, pulların həcmini artırırlar".

İKZF-nin ayırdığı vəsaitin həcmi haqqında da danışan Elnur Fərzəliyev qeyd edib ki, hazırda əmlak bazarındakı bahalaşmanı nəzərə alaraq, kreditin həcmi artırıla bilər:

"Hazırda əmlak bazarının özündə ciddi qiymət artımları baş verir. Təxminən 10 il bundan əvvəl mənzili daha minimum qiymətə almaq olurdusa, hazırda Bakının mərkəz və mərkəzə yaxın ərazilərində ipoteka predmetinə çevrilən evlərdə qiymət artımı çoxdur. Adi ipoteka 150.000 manata, güzəştli ipoteka isə 100.000 manata qədərdir. Təbii ki, 100.000 min manat az pul deyil. Bu qiymətə Sumqayıtda, Xırdalanda, Bakının mərkəzdən uzaq ərazilərində, Gəncə və digər iri şəhərlərimizdə evlər almaq olar. Lakin Bakının mərkəzi üçün bu qiymətlər keçərli deyil. Nəzərə almalıyıq ki, yeni tikili binalarda bir otaqlı, çıxarışlı, təmirli mənzillərin satış qiyməti 130.000-200.000 manat arası dəyişir. Vətəndaş 25 il krediti yalnız 1 otaqlı mənzil üçün ödəmiş olur. Sonrakı illərdə isə ailə tərkibi artıqca otaq sayının artırlması, mənzilin böyüdülməsi isə krediti bağlamayana qədər mümkün olmur. Düzdür 51.000-dən artıq insanın ev sahibi olması çox yaxşıdır, amma düşünürəm ki, gələcəkdə artıq əmlak bazarında baş vermiş qiymət artımını nəzərə alıb kreditin məbləğinin həcmini artırsalar, daha məqsədə uyğun olar. Bu zaman insanlar daha rahat ev ala bilər".